Hos 1 | MEU | STEP | Ina na Iehova ena hereva, Hosea Be-eri enai e kau herevana, Iuda pavapavadia Usia bona Iotam bona Ahasa bona Hesekia bona Israel pavapavana Ieroboam Ioasa edia nega ai.

Hosea 1

Hosea adavana bona natuna

1 Ina na Iehova ena hereva, Hosea Be-eri enai e kau herevana, Iuda pavapavadia Usia bona Iotam bona Ahasa bona Hesekia bona Israel pavapavana Ieroboam Ioasa edia nega ai.

2 Iehova ese Hosea uduna amo e hereva matama negana ai, Iehova ese Hosea e hamaoroa, eto, Aola, ariara hahinena ta bavadavaia, bona ariara memerodia ba havaradia, badina be ina tano taudia e lebulebu hereamu, Iehova irakatanina ai. 3 Taunabunai ia na ela, Gomere, Diblaimi natuna hahinena, e abia; bena hahine na e rogorogo, natuna maruanena ta e abia.

4 Iehova ese e hamaoroa, eto, Ladana ba nemaia Iesrele; badina be asi vanahana lau ese Iehu iduhuna davana baina henia, Iesrele rarana dainai, bona Israel iduhuna basileiana baine ha-orea. 5 Una dina ai Israel ena peva baina hakwaidua, Iesrele kourana ai.

6 Hahine na e rogorogo lou, natuna kekenina ta e abia. Iehova ese Hosea e hamaoroa, eto, Ladana ba nemaia “Se bogaia hisimu”; badina be ina murinai lau ese Israel iduhuna taudia basina bogadia hisi, bona edia dika basina gwau tao, lasi ona lasi vaitani. 7 A Iuda iduhuna taudia baina bogadia hisi; lau Iehova, edia Dirava, sibogu ese baina hamauridia, dia peva eiava dare eiava tuari eiava hosi eiava hosi-gui taudia amo.

8 “Se bogaia hisimu” ese sinana ratana e rakatania murinai, hahine na ma e rogorogo lou, bena mero ta ma e abia. 9 Bena Iehova eto, Ladana ba nemaia “Dia lauegu bese”; badina be umui na dia lauegu bese bona lau na dia emui Dirava.

10 Ḡau tamona, Israel taudia na bae hutuma, kone mirina na heto, basie hahetohodia bona basie duahidia diba ḡauna. E hamaorodia “Umui na dia lauegu bese” gabuna ai, bae hamaorodia, baeto “Mauri Diravana natuna verina”. 11 Bena Iuda taudia bona Israel taudia na bae hahebou, ikwaradia tauna tamona bae gwauraia hidi. Bena tano amo bae dae lao, badina be Iesrele ena dina baine bada.